2 mayor sa Makati may hiwalay na flag ceremony

DALAWANG flag ceremony ang idinaos sa lokal na pamahalaan ng Makati City nitong Lunes.

Nabatid na magkahiwalay na seremonya ang pinangunahan nina Makati Mayor Junjun Binay, kasama si Senator Nancy Binay, sa kasalukuyang city hall, at nanumpang acting Mayor Romulo “Kid” Peña sa lumang municipal hall ng lungsod.

Simula nitong Linggo, balik sa Makati City hall quadrangle ang nasa 2,000 tagasuporta ni Binay makaraan makatanggap ng ulat na tatangkain ng grupong sumusuporta kay Peña na pasukin ang bagong city hall building kasunod ng flag raising ceremony.

Todo-tanggi si Peña sa paratang ngunit inaming nagtawag sila ng ceremony sa kalapit na lumang city hall sa J.P. Rizal Street.

Kapwa iginigiit at nagmamatigas sina Peña at Binay na sila ang alkalde ng lungsod. 

Suportado at kinikilala ng department heads at sangguniang panlungsod si Binay, na una nang nakakuha ng temporary restraining order (TRO) sa suspension order laban sa kanya.

Habang panunumpa na suportado ng utos ng Ombudsman at DoJ ang sinasandigan ni Peña bagama’t nabigo siya nang tangkaing pasunurin ang mga department head sa pamamagitan ng memo.

Jaja Garcia