Misis pinatay, mister tumakas bitbit ang anak

TUMAKAS ang isang retired US serviceman sa Angeles City, Pampanga bitbit ang menor-de-edad nilang anak makaraan barilin at mapatay ang kanyang misis nitong Huwebes ng hapon.

Batay sa paunang ulat, nakarinig ng putok ng baril ang 12-anyos anak na lalaki ng mag-asawang Enrique at Mylene Angeles. 

Nang puntahan, nakita niya ang duguang katawan ng ina sa may banyo habang sa hindi kalayuan ay ang ama na hawak ang baril. 

Agad tumakas ang suspek bitbit ang baril kasabay ng pagtangay sa 2-anyos anak na babae.

Nasa kustodiya na ng lokal na tanggapan ng Department of Social Welfare and Development (DSWD) ang 12-anyos na lalaki at isa pang kapatid na 10-buwan gulang na sanggol. 

Hindi pa batid ng mga awtoridad ang motibo sa pamamaril habang patuloy ang follow-up operation ng pulisya.

Pulis nagrambo, 2 sugatan (Hiniwalayan ni misis)

ILOILO CITY – Dalawa ang sugatan nang mamaril ang isang lasing na pulis makaraan hiwalayan ng kanyang misis sa Brgy. Cawayan, Carles, Iloilo.

Ayon kay Insp. Clarence Sia, kasong frustrated homicide ang isinampa laban kay PO3 Wilfredo Bartolome, nakatalaga sa Balasan Municipal Police Station.

Nabatid sa ulat, habang lasing ang pulis kamakalawa ay hinarang at binaril niya ang magkapatid na sina Rusty at Jocel Tupas.

Bukod sa magkapatid, dalawang iba pa ang tinangka rin niyang barilin ngunit nakatakbo.

Sinasabing hiniwalayan ang suspek ng kanyang misis dahil madalas silang magtalo.

Makaraan ang pamamaril, sumuko ang suspek sa kanyang kapatid na isa ring pulis.