Petisyon para sa drug test vs One Direction inihain sa Pasay RTC

NAGHAIN ng petisyon sa Pasay City Regional Trial Court ang isang grupo para obligahin ang drug test sa British boy band na “One Direction” bago ang nakatakdang concert nila sa bansa sa Marso 21 at 22. 

Sa 10 pahinang petisyon ng Laban ng Pamilyang Pilipino, isang anti-illegal drug group, humingi sila ng temporary restraining order (TRO) laban sa One Direction. 

Dapat anilang i-hold pansamantala ang grupo sa airport para suriin ng Philippine Drug Enforcement Agency (PDEA) ang kanilang gamit para masigurong walang dalang ilegal na droga.

Nakasaad din sa petisyon na dapat pabantayan ang One Direction habang nasa bansa para matiyak na hindi sila gagamit ng ilegal na droga.

Ginamit na basehan ng grupo ang isang kumalat na video na makikitang humihithit ng marijuana ang mga miyembro ng One Direction na sina Zayn Malik at Louis Tomlison. 

Nakunan ang video sa loob ng sasakyan sa Peru nang mag-concert noon ang grupo. 

Nag-tweet noon ang isa pang miyembro ng One Direction na si Liam Payne at humingi ng paumanhin para sa mga kasamahan.