Nora, Migrante dinedma ng Palasyo

BINALEWALA ng Palasyo ang panawagan ng grupong Migrante at ng superstar na si Nora Aunor na magbitiw na si Pangulong Benigno Aquino III dahil sa pagpapabaya sa kondisyon ng overseas Filipino workers (OFWs) at kabiguan na magpatupad ng mga patakaran na lilikha ng mga trabaho sa bansa.

Nag-rally kahapon ang Migrante at si Nora sa Mendiola upang gunitain ang ika-20 aniberasryo nang pagbitay sa Filipina domestic helper na si Flor Contemplacion sa Singapore.

Ayon kay Communications Secretary Herminio Coloma Jr., ibinibigay ng gobyerno, sa pamamagitan ng mga embahda at konsulado, ang lahat ng kinakailangang ayuda sa mga Filipino sa death row kaya’t hindi makatwiran at walang batayan ang panawagan ng Migrante at ng aktres.

Matatandaan, unang lumahok si Nora sa kilos-protesta na nanawagan sa pagpapababa sa Pangulo noong 2001 sa EDSA People Power 1, na nagbigay-daan sa pagpapatalsik kay noo’y Pangulong Joseph Estrada, na dati niyang karelasyon.

Ibinulgar ni Nora na sinasaktan siya ni Estrada nang sila’y magkarelasyon pa, ngunit makalipas ang 11 taon o noong 2012 ay humingi ng public apology ang aktres sa dating nobyo.

Rose Novenario