BIFF Komander Tambako, 3 pa timbog sa GenSan

GENERAL SANTOS CITY – Hawak na ng mga awtoridad si Komander Muhammad Ali Tambako ng BIFF makaraan mahuli kamakalawa ng gabi sa Brgy. Calumpang, sa lungsod ng Heneral Santos.

Nahuli si Tambako ng mga elemento ng CIDG-12, Joint Task Force GenSan, General Santos City Police Office, ISG, 6MIB, MIG-12, at NICA-12 dakong 9 p.m. kasama ang tatlo pang BIFF members.

Pumasok sa Brgy. Calumpang kamakalawa ng gabi si Tambako ngunit agad hinuli sa bisa ng warrant of arrest na pirmado ni Judge George Jabido ng Regional Trial Court Branch 15 sa Cotabato City dahil sa kasong murder at double frustrated murder.

Hindi na nakapanlaban si Tambako at ang mga kasamahan na may bitbit na tatlong fragmentation grenade at dalawang short firearms.

Agad dinala sa himpilan ng CIDG Reg. 12 ang apat at isinailalim sa imbestigasyon.

Kung maaalala, si Tambako ay tumiwalag sa BIFF makaraan ang pamumugot ng ulo sa Maguindanao noong nakaraang taon.

Kamakailan, inihayag ni Bangsamoro Islamic Freedom Movement spokesman Abu Misry ang kaugnay sa ‘expulsion’ ni Tambako sa grupo at bilang BIFF vice chairman for political affairs.

Bunsod nito, nagtayo si Tambako ng panibagong grupo, ang tinaguriang Justice for Islamic Movement (JIM).

Sinasabing si Tambako ay dati na ring naging miyembro ng MILF at MNLF.