Student financial assistance bill lusot na sa Senate committee

LUSOT na sa committee level ng Senado ang Senate Bill 2679 o ang Unified Student Financial Assistance System for Tertiary Education (Unifast Act).

Layunin ng panukala na iniakda ni Sen. Sonny Angara, na palawigin ang financial assistance ng pamahalaan sa karapat-dapat na estudyante o mga tunay na mahirap ngunit matatalinong kabataan.

Binigyang-diin ni Angara, daan-daang libo ang mahihirap pero magagaling na estudyante sa bansa, umabot lamang sa kabuuang 60,000 ang mga nakinabang sa tulong-pinansyal ng Commission on Higher Education noong 2011 o 20 porsiyento lamang ng 2.7 milyong mag-aaral sa tertiary level.

Ang nakalulungkot pa aniya, halos karamihan sa mga nabibiyayaan ng tulong pinansiyal at yaong mga nakaririwasa na sa buhay.

Sa kanyang panukala, gagawing scholar ang mga estudyanteng may matataas na grades ngunit ipa-prioridad ang mga kabataang mula sa pamilyang benepisaryo ng Conditional Cash Transfer program.

Layunin din ng Senate Bill 2679, na magpatupad ng socialized tuition fee scheme na ibabatay sa personal na kapasidad ng mag-aaral kabilang ang kinikita ng kanyang pamilya.      

Niño Aclan / Cynthia Martin