Taiwanese vessel naglaho sa South Atlantic Ocean (13 Pinoy pasahero)

NANGANGALAP pa ng dagdag na impormasyon ang Department of Foreign Affairs (DFA) hinggil sa ulat na kabilang ang 13 Filipino sa lulan ng nawawalang Taiwanese vessel sa remote area ng South Atlantic Ocean.

Batay sa impormasyon, kabilang sa mga nawawala ang Taiwanese skipper at chief engineer, 11 Chinese national, 21 Indonesian, 13 Filipino, at dalawang Vietnamese sailors.

Una rito, ayon sa mga awtoridad, 49 crew ang nakasakay sa barkong “Hsiang Fu Chun” nang biglang mawalan ng contact sa may-ari ng nasabing vessel makaraan i-report na pinapasok ng tubig ang kanilang deck.

Ang 700-ton squid fishing vessel ay nawala dakong 3 a.m. noong Pebrero 26.

“The vessel was sailing about 1,700 nautical miles (3,148 kilometers) off the Falkland Islands when it vanished,” nakasaad sa satellite data.

Naglunsad na ng search operation ang Taiwan at umapela ng tulong sa Argentina at Britanya at sa iba pang barko na nasa paligid ng karagatan.

“We still don’t know where the ship is and what happened to it,” wika ni Huang Hong-yen, spokesman ng Fisheries Agency.

Wala aniyang ebidensiya na lumubog ang Taiwanese vessel lalo’t mayroon itong equipment na magbibigay ng “mayday signal” sakaling napadpad sa ilalim ng karagatan.