3 anak ini-hostage ng ama (Dahil sa selos)

GENERAL SANTOS CITY – Nasagip ng pulisya ang tatlong bata makaraan i-hostage ng kanilang ama sa loob ng kanilang bahay sa Tindalu St. Balite, Brgy. Lagao sa lungsod na ito kahapon.

Kinilala ang suspek na si Benito Marfori Cruz, 47-anyos, isang fishcar driver.

Nangyari ang hostage-taking incident nang mag-away ang suspek at kinakasama niyang si Alma Cabanlit Lim.

Nagcheck-in sa isang lodge ang mag-live-in partner at nag-away na nagresulta sa pambubugbog ng suspek nang may nabasa na hindi maganda sa cellphone ng kinakasama.

Iniwan ng babae sa lodge ang suspek at humingi ng tulong sa isang kaibigan.

Dumulog kahapon ng madaling araw si Alma sa Lagao PNP at nang magresponde ang mga pulis, nadatnan na ini-hostage ng suspek ang mga anak na may gulang na 2, 9 at 14-anyos na sugatan ang leeg.

Ang 14-anyos dalagita ay anak ni Alma sa dati niyang kinakasama.

Tumagal ng ilang mga oras ang negosasyon bago sumuko sa mga awtoridad ang suspek at nailigtas ang tatlong bata nang nakombinsi ng malapit na kaibigan na si Edwin Batallier.

Nananatiling nasa kustodiya ng Lagao PNP ang suspek habang ginagamot ang sugat ng 14-anyos biktima.