HATAW! D'yaryo ng Bayan hatawtabloid.com
UMAABOT sa 768 overseas Filipino workers ang nakauwi nang bansa mula sa Libya sakay sa dalawang chartered flight ng Philippine Airlines (PAL) na dumating Sabado ng gabi at madaling araw kahapon.
Dahil sa nagpapapatuloy na labanan sa nasabing lugar, itinaas ng Department of Foreign Affairs (DFA) sa Crisis Alert Level 4 ang sitwayson sa Libya noong Hulyo 20 at ipinatutupad ang total deployment ban patungong North African country at nananawagan ng mandatory repatriation sa lahat ng OFWs.
Sa report ng DFA, dumating nitong Sabado ang unang batch ng 419 OFWs sa NAIA 2 dakong10 p.m. at personal silang sinalubong nina Foreign Affairs Secretary Albert del Rosario at Vice President and Presidential Adviser on OFW concerns Jejomar Binay.
Ang pangalawang batch ay binubuo ng 349 OFW na dumating dakong 3:45 a.m. kahapon sa NAIA 2.
Binigyan ng mga bag na naglalaman ng pagkain, tubig at T-shirts ang umuwing OFWs.
Mismo ang pamahalaan ang sumundo sa mga OFW sa Libya na sakay ng dalawang chartered flight.
Ikinatuwa ng OFWs ang naging mainit na pagtanggap sa kanila ng pamahalaan.
Samantala, ayon sa DFA, batay sa kanilang datos mayroon pang 10,000 Filipino ang kasalukuyang nasa Libya pa.
