HATAW! D'yaryo ng Bayan hatawtabloid.com
MALAMIG na bangkay na ang isang lalaki nang matagpuan sa tapat ng Centro Escolar University sa San Miguel, Maynila, kamakalawa ng gabi.
Hindi pa nakikilala ang biktima, na tinatayang nasa 42-47 anyos, kulay orange ang damit, nakaitim na tokong at may tattoo na ‘JOSEP’ at ‘FE’ sa kanyang kaliwang braso.
Ayon sa gwardyang si Ruselo Robles, duty guard ng CEU, nag-iikot-ikot s’ya nang mapansin sa tapat ng South Gate ang nakahandusay na lalaki.
Agad n’yang tinawagan ang supervisor upang pagtulungang lapatan ng paunang lunas ang biktima ngunit wala nang pulso. Batay sa report ni PO3 Melvin Carbonida, maaaring lubusang pagkagutom at uhaw ang ikinamatay ng biktima dahil nakahawak sa kanyang tiyan bago tuluyang mawalan ng hininga.
Gayon pa man isinailalim sa imbestigasyon ang pagkamatay ng naturang biktima. (JOHN BRYAN ULANDAY)
