Pahinante tepok driver kritikal sa ‘hijackers’

PATAY ang isang pahinante habang nasa malubhang kalagayan ang kasamang driver nang saksakin ng dalawang hindi nakilalang suspek dahil pumalag ang dalawa sa tangkang pag-hijack sa dala nilang container  van kahapon ng umaga sa lungsod ng Las Piñas.

Nalagutan ng hininga bago idating sa Ospital ng Parañaque si William Batuga Biagcong, pahinante, ng 44 B-1, Bernal S Bank Road, Floodway, San Andres, Cainta, Rizal, may tama ng dalawang saksak sa katawan

Habang mula sa Las Piñas District Hospital ay inilipat sa Zarate Medical Center ang driver na si Zandro Margallo, 34, ng Movers Forwarders, residente ng Tipas, Taguig City, tinamaan ng saksak sa iba’t ibang bahagi ng katawan.

Nagsasagawa na ng follow-up operation ang Las Piñas City Police kaugnay sa insidente at inaalam ang pagkakakilanlan ng dalawang suspek.

Base sa inisyal na report na natanggap ni Las Piñas City Police chief, Sr. Supt. Adolfo Samala, Jr., dakong 5:20 a.m. nang maganap ang insidente sa C5 Extension, Brgy. Manuyo Dos ng nabanggit na siyudad.

Minanamaneho ni Margallo ang container van (RHT-107) at kalalabas lamang mula sa SM Warehouse, ngunit lingid sa kanilang kaalaman ay inaabangan sila ng isa sa mga suspek na armado ng baril.

Tinutukan ng baril ang dalawang biktima at pinatigil ang container van na tangkang i-hijack.

Nang babarilin ng suspek ang dalawang biktima ay hindi pumutok ang baril. Sa puntong ito, nagkaroon ng lakas ng loob ang dalawa na pumalag ngunit inundayan sila ng saksak ng isa pang suspek. (JaJA GARCIA)