3 anak ini-hostage ng amang ex-con

CEBU CITY – Tumagal ng siyam na oras ang ginawang negosasyon ng mga awtoridad sa isang ama na nang-hostage sa tatlo niyang mga anak sa Sitio Camalig Bato, Brgy. Tabok, Lungsod ng Danao, Cebu, simula kamakalawa ng gabi.

Kinilala ang suspek na si Eduardito Durano, 49, walang trabaho, residente sa nasabing lugar at isang ex-convict.

Ayon kay Sr. Insp. Cesar Misola, hepe ng Danao Police, may natanggap silang alarma pasado-10:30 p.m. mula sa isang concerned citizen na may namataang armadong lalaki sa naturang lugar.

Mabilis na nagresponde ang mga awtoridad at naabutan pa nila si Durano ngunit tumakas sakay ng Pajero (JFH577).

Hinabol ng mga awtoridad ang suspek hanggang sa makaabot na sila sa bahay ng salarin na bumaba at tumakbo papasok sa kanilang tahanan.

Nagkataong naroon ang tatlong mga anak ng suspek na kanyang ini-hostage.

Nagbabala si Durano na may masamang mangyayari kung susubukan ng mga awtoridad na sumugod.

Sinabi rin niya na susuko lamang siya kung pupunta ang ex-mayor sa naturang siyudad na kamag-anak din niya.

Pagkalipas ng ilang oras ay nag-demand siya ng sasakyan para makapunta sa ospital para mapatingin ang sakit niya sa puso.

Agad ipinarada ng mga awtoridad ang Pajero ng suspek malapit sa pintuan ng bahay ngunit sa aktong sasakay na ay nalaman na pulis pala ang nagmamaneho sa naturang sasakyan.

Nagtangka pang tumakas ang suspek ngunit agad naharang ng mga awtoridad.

Nakuha sa sasakyan ng suspek ang limang pakete ng shabu at isang rifle grenade.

Nahaharap sa patong-patong na kaso ang ama habang nasa pangangalaga na ng Department of Social Welfare and Development ang kanyang tatlong mga anak.