Ina pinugutan ng anak na ex-OFW

ILOILO CITY – Patay ang isang ginang makaraan pugutan ng ulo ng kanyang anak na lalaki sa Brgy. Bonbon, Lambunao, Iloilo kamakalawa ng gabi.

Kinilala ang biktimang si Erlinda Liderato, 65, habang agad naaresto ang suspek na si Alendre, 35-anyos, kapwa ng nasabing lugar.

Ayon kay Punong Brgy. Rolando Araceli, may dinaranas na nervous breakdown ang suspek kaya’t nagawang pugutan ng ulo ang kanyang sariling ina.

Natagpuan ang bangkay ng ina sa labas ng kanilang bahay na ang pugot na ulo ay nakapatong sa katawan.

Sa imbestigasyon, tinaga ng suspek ang kanyang ina sa balikat ngunit nakalabas pa ng bahay ang biktima para humingi ng tulong gayonman ay naabutan at doon na pinugutan ng ulo.

Nang makita ng kapatid na babae ng suspek na may hawak na patalim at may dugo sa shorts ang salarin ay humingi siya ng tulong sa barangay officials.

Sa pagresponde ng mga tanod ay natagpuan ang pugot na biktima.

Ayon sa punong barangay, bago nagka-nervous breakdown, mabait at masunuring anak ang suspek.

Nagtrabaho pa aniya sa Saudi Arabia ang suspek at ipinagawa ang kanilang bahay.

Gayonman, pinauwi ng kanyang employer ang suspek nang makitaan ng mga sintomas ng clinical depression.

Napag-alaman na gumamit ang mga tanod ng tear gas upang masakote ang suspek at iginapos.

Pansamantalang ikinulong ang suspek sa kanilang kubo habang ipinoproseso ang pagdadala sa kanya sa mental hospital.

ni BETH JULIAN