Holdaper sugatan sa hinoldap na parak

NAARESTO habang nilalapatan ng lunas sa Sta. Ana Hospital ang isa sa riding in tandem na nangholdap sa isang pulis habang nagpapahinga sa harap ng kanilang bahay sa San Andres, Maynila kahapon.

Kinilala ang biktimang si SPO4 Diosdado Camus, 54, ng Diamante Street corner Road 2, San Andres Bukid, Maynila, nakatalaga sa MPD Station 6.

Mahigpit na binabantayan ng mga pulis ang isa sa mga suspek na si Alvin Carino, ng #1801 Int. 22, Barrio La Purisma, Paco, Maynila, naka-confine sa nabanggit na ospital.

Nakatakas ang isang suspek na hindi rin nakilala.

Ayon kay SPO1 Ronald Santiago, dakong 2:30 p.m. habang nagpapahinga ang biktima sa harap ng kanilang bahay biglang huminto ang motorsiklo ng mga suspek.

Tinutukan ng mga suspek ang biktima ng patalim sabay hablot ng kwintas ng pulis. Ngunit lumaban ang pulis at pinaputukan ang dalawang salarin. Bagama’t may tama, nakatakas si Carino at ang kanyang kasamang holdaper.

Gayonman, sa follow-up operation ng mga awtoridad ay natunton si Carino habang ginagamot sa Sta. Ana Hospital.

– LEONARD BASILIO

(May kasamang ulat nina CAMILLE BOLOS, NIKKI-ANN CABALQUINTO, ANTONIO MAAGHOP, JR., BHENHOR TECSON, at LARA LIZA SINGSON)