Wanted sa pagpatay timbog sa pagnanakaw

RIZAL – Nagwakas ang matagal nang pagtatago sa batas ng isang suspek sa pagpatay sa Malolos, Bulacan nang madakip sa kasong pagnanakaw at nakilala ng anak ng kanyang biktima sa Antipolo City.

Kinilala ni Antipolo City Police chief, Supt. Arthur Masungsong ang suspek na si Roel Segobia alyas Dodong, 36, residente ng Purok 2, Pagrai Hills, Brgy. Mayamot ng nasabing lungsod.

Si Segovia ay suspek sa pagpatay kay Violeta Ebardo, 59, residente ng Matangtubig, Malolos, Bulacan, sinampahan ng kaso sa Malolos Regional Trial Court noong taon 2012 ngunit nagtago.

Ayon sa ulat, nadakip sa pagnanakaw ang suspek noong Marso 3, 2014 ngunit nagpakilala bilang si Ruel Hugar y Aguellosa. Nakatakda na sana siyang makalaya makaraan maglagak ng pyansa ngunit nakilala siya ng isang anak ni Ebardo na si Liza Guarin, nagkataong nakatira sa Brgy. Dela paz, Antipolo City.

Ang suspek ay nakatakdang dalhin sa Malolos RTC para litisin kaugnay ng kasong pagpatay.

(MIKKO BAYLON)