HATAW! D'yaryo ng Bayan hatawtabloid.com
HINIHINALANG problema sa live-in partner kaya lumundag mula 19th floor ang 28-anyos, laborer, sa gusaling kanyang pinagtratrabahuan, sa Ermita, Maynila, kamakalawa ng gabi.
Namatay habang ginagamot sa Ospital ng Maynila ang biktimang si Edil Henry, stay-in laborer, sa ginagawang Tower 5 Suntrust Parkview, Concepcion St., Ermita.
Sa report ni Det. Milbert Balinggan ng Manila Police District -Homicide Section, dakong 11:20 ng gabi nang naganap ang insidente.
Ayon kay Al John Arago, 21, kasamahan ng biktima, dakong 9:00 ng gabi nang dumating ang biktima sa kanilang barracks, nagpabili ng gin at softdrinks.
Nagyayang makipag-inuman ang biktima, kasama ang mga katrabaho na sina Kenneth Nocor, Jimmy Gambal at Orlan Baldos.
Sa harap ng inuman, idinaing ng biktima ang kanyang problema sa ka-live in na planong humiwalay sa kanya.
Nang paubos na ang kanilang inumin, kinuha ng biktima ang kanyang cellphone at isinanla sa halagang P200 kay Orlan at nagyayang mag-beer house .
Pagkaubos ng dalawang mucho, nagbalikan na ang mga magkakasama sa kanilang barracks para matulog.
Dakong 11:20 ng gabi, ginising ni Arago ang mga kasamahan at ibinalitang nalaglag mula 19th floor at bumagsak sa hinuhukay na kanal si Henry.
Nakalagak ang bangkay ng biktima sa Nathan Funeral para sa awtopsiya at safekeeping.
(BRIAN GEM BILASANO)
