Ama ni Eala pinuri ang PSC

WALANG iba kundi si Mike Eala, ama ng tennis star na si Alex Eala, ang nagpaabot ng pagbati kay Philippine Sports Commission (PSC) Chairperson Patrick “Pato” Gregorio para sa matagumpay na pagdaraos ng kauna-unahang Philippine Women’s Open sa Rizal Memorial Tennis Center.

“Isang panalong-panalo na event. Regalo ninyo ito sa bansa. Ipagpatuloy ninyo ang pagbibigay ng ganitong kahanga-hangang mga palaro sa sambayanan. Hindi matatawaran ang inspirasyong dulot nito (ng Philippine Women’s Open). Binabati kita,” ayon kay Gregorio na sinipi ang sinabi ng nakatatandang Eala sa kanilang pag-uusap kamakailan.

“Salamat sa pagsasakatuparan nito! Tungo na sa susunod,” dagdag pa ng ama ng atleta.

Ibinahagi ni Gregorio, na siyang nanguna sa pagdaraos ng kauna-unahang WTA 125 tournament sa bansa, ang papuri ng ama ni Eala dahil, ayon sa kanya, “kailangan nating mapangiti ang mga Pilipino. Napakaganda ng kanyang sinabi.”

Gayunman, hindi inangkin ni Gregorio ang buong kredito sa pagho-host ng malaking pandaigdigang kompetisyon sa tennis na inorganisa ng Philippine Tennis Association na pinamumunuan ng pangulo nitong si Parañaque City Mayor Eric Olivarez at ng secretary-general na si Navotas City Mayor John Rey Tiangco, at pinahintulutan ng Women’s Tennis Association na nangangasiwa sa women’s pro tour.

“Kung paanong kailangan ng isang komunidad upang makalikha ng world-class na atleta, kailangan din ng maraming katuwang upang makabuo ng isang pandaigdigang sporting event na maipagmamalaki nating lahat,” diin niya.

“Hindi lamang ang aming mga tao sa PSC ang nagtrabaho nang walang tigil upang makalikha ng angkop na kapaligiran para sa Philippine Women’s Open mula nang inanunsyo namin ito noong Disyembre, kundi nariyan din ang aming mga pangunahing katuwang na naging dahilan upang magtagumpay ito,” paliwanag ni Gregorio.

Kabilang sa mga ito, aniya, ang Pamahalaang Lungsod ng Maynila sa pamumuno ni Mayor Isko Moreno, ang DPWH na pinamumunuan ni Secretary Vince Dizon, ang Metro Manila Development Authority (MMDA), at ang Tourism Infrastructure and Enterprise Zone Authority (TIEZA) sa ilalim ni Mark Lapid.

“Dahil sa aming mga katuwang tulad ng Pamahalaang Lungsod ng Maynila sa ilalim ng masiglang pamumuno ni Mayor Isko, ang MMDA, TIEZA, at siyempre ang ating kapulisan, naihanda namin ang entablado para sa pagdaraos ng pandaigdigang sporting event na ito,” ani Gregorio nang buong pagmamalaki.

“Ang katotohanang nagawa natin ang lahat ng ito sa rekord na panahon ay patunay ng kakayahan at diwa ng bayanihan ng mga Pilipino.”

Ayon kay Gregorio, ang torneo—na dinagsa ng mga manonood at palaging sold out—ay patikim lamang ng potensyal na kita ng mga pandaigdigang palaro sa bansa, na nilikha ng National Sports Tourism–Inter Agency Committee sa bisa ng Administration Order No. 38 ni Pangulong Ferdinand “Bongbong” Marcos Jr.

“Maging ang mga internasyonal na manlalaro ay humahanga sa ating pagho-host. Isipin ninyo ang mga salitang ipapasa nila sa kanilang mga kababayan. Hindi matatawaran ang epekto ng mga damdaming ito,” aniya. (PSC ICE/HNT)