HATAW! D'yaryo ng Bayan hatawtabloid.com
IPINAHAYAG ni Philippine Olympic Committee (POC) President Abraham “Bambol” Tolentino ang pagpili sa dalawa sa pinaka-kilala at pinaka-maimpluwensiyang atleta ng 2025—ang tennis prodigy na si Alexandra Eala at volleyball standout na si Bryan Bagunas—bilang mga flag-bearer ng Team Philippines sa parada ng mga atleta sa pagbubukas ng 33rd Southeast Asian Games sa Bangkok, Thailand sa Martes, Disyembre 9.
Ayon kay Tolentino, “Higit pa sa kanilang kasikatan, sina Alex at Bryan ay nagbigay ng makabuluhang kontribusyon at impluwensiya sa internasyonal na larangan ng isports, kaya’t sila ang pinakamainam na hirangin upang magdala ng ating pambansang watawat sa SEA Games.” Idinagdag pa niya na ang Pilipinas ay nakatalaga ng 300-kataong delegasyon—na maaaring mabawasan sa humigit-kumulang 200 dahil sa year-long mourning para kay Queen Sirikit at sa trahedyang naganap sa Songkhla—para sa pagmartsa sa paligid ng Rajamangala National Stadium.
Tinatayang mahigit 1,700 atleta ang isasabak ng Pilipinas sa SEA Games na may 574 na kompetisyon sa 50 sports. Gaganapin ang mga ito sa dalawang pangunahing sentro—Bangkok at Chonburi—matapos hindi maisama ang Songkhla dahil sa matinding pagbaha.
Ang pag-angat ni Eala sa tennis ay maituturing na pambihira; siya ngayon ang may pinakamataas na ranggo sa kasaysayan ng Philippine tennis sa Women’s Tennis Association at ang kauna-unahang Filipina na lumagpas sa unang round ng US Open.
Samantala, si Bagunas ang naging pangunahing sandigan ng Alas Pilipinas Men’s Team sa FIVB World Championship noong nakaraang Setyembre, na pinangunahan ang makasaysayang tagumpay laban sa maraming beses na African champion na Egypt—ang una para sa Pilipinas sa FIVB competition. Naging mahalaga rin siya sa laban na halos makamit kontra sa Asian powerhouse na Iran.
Binanggit ni Tolentino na ang pagpili ng flag-bearer ay isang seryosong tungkulin para sa POC, at karaniwang iginagawad sa atletang may pinakamalakas na impluwensya, inspirasyon, at kakayahang magbigay-motivasyon sa mga pambansang atleta at sa kabataang Pilipino.
“Mahigpit naming isinasaalang-alang ang inspirasyonal na puwersa, dedikasyon, at mga nakamit ng atleta. Ang mga ito ang nagiging batayan kung bakit sila ang karapat-dapat sa ganitong mahalagang tungkulin,” ani Tolentino. (POC /HNT)
