HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez
OPISYAL nang inilabas ang Kayong Dalawa Lang ni Love Kryzl.
Ang kantang ito ay inihandog para sa malapit nang ikasal na sina Kiray Celis at Stephan Estopia.
Ibinabahagi ng awitin ang isang tunay na kwento ng pag-ibig, kasiyahan, at ang mga karaniwang pagsubok na pinagdaraanan ng magkasintahan bago ikasal—na nagpapaalala na ang pag-ibig ay laging nagwawagi kapag pinipili ang isa’t isa.
Ang pamagat na Kayong Dalawa Lang ay simple ngunit may malalim na kahulugan: kapag paulit-ulit mong pinipili ang iyong kapareha, hindi imposible ang “forever.” Ang anumang relasyon ay malalampasan ang lahat basta’t pinipili ninyong manatili sa isa’t isa.
Ibinahagi rin ni Love Kryzl na hinahangaan niya sina Kiray at Tepan bilang magkasintahan. Malaki ang naging inspirasyon sa kanya ng paraan ng kanilang pag-aalaga at pagmamahalan.
Ang kanta at music video ay prodyus ng Purple Hearts Production, isang in-house company ng Kryzl Group of Companies.
Inanunsiyo rin na si Love Kryzl ay maglulunsad pa ng isa pang single ngayong taon at inaasahang magkakaroon ng concert ang batang CEO sa susunod na taon.
Ang music video ay mapapanood na sa Love Kryzl Facebook Page at sa Love Kryzl’s World YouTube Channel.
Bilang paghahanda sa kanilang kasal, ibinahagi ng child actress at CEO na si Kiray na bumili siya ng Purple Hearts Products—ang brand na pagmamay-ari nina Love Kryzl at ng kanyang mga kapatid—para isama sa kanilang wedding giveaways.
Nang tanungin kung ano ang magiging regalo niya kina Ate Kiray at Kuya Stephan para sa kanilang espesyal na araw, anang batang CEO, ireregalo niya ang hotel reception venue at ang event styling ni Gideon Hermosa.
