PSC, DepEd, DBM, Hidilyn Diaz-Naranjo nagsanib-puwersa para ilunsad ang pinakamalaking weightlifting academy sa bansa

MAKIKIPAGTULUNGAN ang Philippine Sports Commission (PSC) sa Department of Education (DepEd) at Olympic gold medalist na si Hidilyn Diaz-Naranjo upang maitatag ang pinakamalaking weightlifting academy sa Pilipinas.

Ang pagtutulungang ito para palakasin ang mga school-based sports ay isa sa mga direktibang binigyang-diin ni Pangulong Ferdinand R. Marcos Jr. sa kanyang huling State of the Nation Address (SONA).

Sa isang kamakailang pagpupulong kasama si PSC Chairman Pato Gregorio, ibinahagi ni DepEd Secretary Sonny Angara na mayroong hindi bababa sa 298 paaralan sa buong bansa na kasalukuyang may specialized sports curriculum, na nagbibigay sa mga student-athlete ng mas maraming oras para sa pagsasanay at pisikal na pag-unlad.

Binigyang-diin nina Angara at Gregorio na dapat maging pundasyon ng programa ang weight training at weightlifting, na siyang magsisilbing makina ng edukasyong nakatuon sa sports.

“Ang pangunahing pangangailangan sa kahit anong isport ay weightlifting,” sabi ni Gregorio. “Pero hindi pwedeng basta na lang magbigay ng kagamitan nang hindi tinuturuan ang mga student-athlete kung paano ito gamitin nang tama at ligtas. Dapat may magturo ng mga batayan.”

Dito papasok si Diaz-Naranjo at ang kanyang HD Weightlifting Academy. Sa taglay niyang walang kapantay na karanasan at bilang kauna-unahang Olympic gold medalist ng bansa, siya ang pinaka-angkop upang manguna sa paghubog ng susunod na henerasyon ng mga kampeon.

“Kailangan mo ng isang kampeon, isang huwaran, para itulak ang planong ito,” sabi ni Gregorio. “Hindi puwedeng basta na lang ihulog ang kagamitan at bahala na sila. Kailangan si Hidilyn Diaz at ang kanyang academy para maiparating ang programang ito sa bawat isa sa 298 paaralan.”

“Matagal nang tumutulong si Hidilyn sa paghuhubog ng mga batang atleta,” ani Secretary Sonny Angara. “Sa pamumuno ni Chairman Pato sa PSC, naisasakatuparan natin ang bisyon ni Pangulong Bongbong Marcos.”

Samantala, buong suporta naman ang ipinahayag ni DBM Secretary Amenah Pangandaman sa makabuluhang inisyatiba, at binigyang-diin ang kahandaan ng administrasyon ni Pangulong Ferdinand R. Marcos Jr. na pondohan ang proyekto.

“Para maisakatuparan ang proyektong ito, nauunawaan naming kailangang maglaan ng pondo ang pamahalaan,” sabi ni Sec. Amenah.

“Suportado po ni Pangulong Bongbong Marcos ang anumang hakbangin upang mapaunlad ang larangan ng sports sa bansa. Sinabi niya po ’yan sa kanyang SONA, kaya kami po, sa DBM, asahan n’yo pong nakasuporta at handang umagapay sa ating mga atleta para tugunan ang mga pangangailangan nila, kagaya po ng pagpapatayo ng weightlifting academy na ito,” dagdag pa ni Pangandaman.

Sa suporta ng DBM, maglalaan ng ₱180 milyon para sa proyekto.

Ang PSC, DepEd, at DBM ay nagsasama-sama upang tuparin ang direktiba ni Pangulong Ferdinand Marcos Jr. na palakasin ang mga school-based sports program sa pamamagitan ng pagtatayo ng mga sports club at pag-upgrade ng mga pasilidad.
Ang pakikipagtulungan ng PSC at DepEd ay isang malaking hakbang patungo sa pagtatatag ng National Grassroots Sports Program, bilang tugon sa utos ng Pangulo.

Habang hindi pa kumpleto ang listahan ng mga paaralang lalahok, kinumpirma ni Gregorio na pipirma ng isang tripartite agreement ang PSC, DepEd, at si Diaz-Naranjo, na kasalukuyang nagpapatakbo ng kanyang academy sa Jala-Jala, Rizal kasama ang kanyang asawa at coach na si Julius Naranjo.

“Biglang nagkaroon si Hidilyn ng halos 300 weight training facilities sa buong bansa,” sabi ni Gregorio. “Wala nang mas angkop pa para magpatupad ng planong ito.”

Inilarawan niya ang papel ng PSC bilang tagapagpadali — nagsasama ng mga resources, ekspertis, at partnership upang maisakatuparan ito sa buong bansa.

Upang masimulan ang programa, plano ng PSC na magbigay ng ₱100,000 halaga ng weightlifting equipment sa bawat paaralan at humingi ng karagdagang suporta mula sa mga pribadong sponsor at sports foundations.

“Bago ang implementasyon, mag-oorganisa muna tayo ng summit para sa mga weightlifting coach. Pagkatapos nito, doon natin ibibigay ang mga kagamitan,” paliwanag ni Gregorio. “Madaling i-install ito, kailangan lang ng espasyo. Maglalaan ng pondo ang PSC para maisagawa ito.”

“Ang resulta ay isang pambansang PSC-DepEd-Hidilyn Diaz Weightlifting Academy,” pagtatapos ni Gregorio. (PSC-PIO)


Photo caption:

KALIHIM ng DBM na si Amenah Pangandaman (kaliwa) ay nangakong susuporta sa inisyatiba ni PSC Chairman Pato Gregorio kasama ang DepEd, sa halagang ₱180 milyon. (PSC-PIO photo)