HATAW! D'yaryo ng Bayan hatawtabloid.com
DINAKIP ng mga awtoridad ang isang lalaking pinaniniwalaang kabilang sa grupo ng agaw-motorsiklo sa lungsod ng San Jose del Monte, lalawigan ng Bulacan, nitong Miyerkoles ng gabi, 16 Hulyo.
Kinilala ang suspek na si alyas JB, 30 anyos, residente ng SJDM Heights, Brgy. Muzon, sa nabanggit na lungsod, na naaktuhang kinakatay ang isang ninakaw na motorsiklo sa loob ng kaniyang tirahan.
Ayon sa ulat na isinumite kay P/Lt. Col. Reyson Bagain, hepe ng San Jose del Monte CPS, naganap ang insidente nang samantalahin ng suspek ang pagkakaiwan ng biktimang 24-anyos na lalaki, sa kaniyang motorsiklo sa Phase 1, SJDM Heights.
Agad na isinumbong ng biktima sa mga opisyal ng barangay ang insidente, na agad na rumesponde kasama ang mga tauhan ng San Jose del Monte CPS upang matunton ang tirahan ng suspek.
Dito na naaktuhan ng mga operatiba ang suspek habang kinakatay ang sinikwat na motorsiklo upang paghiwa-hiwalayin ang mga piyesa nito para ibenta.
Sa isinagawang pag-aresto, narekober mula sa suspek ang isang improvised na baril (sumpak) na may isang buhay na bala, na tinangka pa niyang gamitin laban sa mga awtoridad.
Kasalukuyang inihahanda ang kasong paglabag sa RA 10883 (New Anti-Carnapping Law) at RA 10591 (Comprehensive Law on Firearms and Ammunition Regulation) na isasampa laban sa suspek.
Ang mabilis na pagtugon ng San Jose del Monte CPS, katuwang ang mga opisyal ng barangay, ay patunay ng patuloy na pagtupad ng Bulacan PPO sa pamumuno ni P/Col. Angel Garcillano, acting provincial director, sa kanilang tungkulin na panatilihin ang kapayapaan at kaayusan sa lungsod. (MICKA BAUTISTA)
