HATAW! D'yaryo ng Bayan hatawtabloid.com
ALAM MO NA!
ni Nonie Nicasio
INAPRUBAHAN ng Movie and Television Review and Classification Board (MTRCB) ang pagpapalabas ng apat na pelikulang nakatakdang mapanood sa mga sinehan ngayong linggo.
Kabilang dito ang animated film mula sa Disney at Pixar na “Elio,” na rated PG (Patnubay at Gabay ng Magulang). Ibig sabihin, angkop ito para sa mga bata na edad 13 pababa basta’t may kasamang magulang o nakatatanda.
Tungkol ito pakikipagsapalaran ni Elio, isang batang lalaki na aksidenteng naging kinatawan ng kanyang planeta matapos kunin ng mga alien.
Samantala, dahil sa tema, ang lokal na pelikulang “Flower Girl” na pinagbibidahan nina Sue Ramirez, Martin Del Rosario at Jameson Blake ay rated R-16, na nangangahulugang ito ay para lamang sa mga edad 16 at pataas.
Kuwento ito ni Ena, isang endorser ng sanitary napkin, na nagising na nawawala ang kanyang pagkababae matapos ang isang di-inaasahang engkwentro sa isang mahiwagang diwata.
Nakatanggap din ng R-16 ang mga thriller films na “Dangerous Animals” at “28 Years Later” dahil sa matitinding eksena ng karahasan at katatakutan na maaaring hindi angkop para sa mga batang manonood.
Hinimok naman ni MTRCB Chairperson at CEO Lala Sotto-Antonio ang pamilyang Filipino na manood at isaisip ang kahalagahan ng responsableng panonood.
“Inaanyayahan namin ang bawat pamilya na manood sa mga sinehan at maaliw sa mga palabas ngayong linggo, habang isinusulong ang responsableng panonood,” sabi ni Sotto-Antonio.
