Tulak arestado sa P6.8-M shabu

DINAKIP ang isang lalaking itinuturing na big time tulak matapos kumagat sa buybust ng mga awtoridad at makompiskahan ng aabot sa P6.8 milyong halaga ng shabu sa Valenzuela City nitong Miyerkoles ng hapon.

Dakong 5:30 ng hapon nitong Miyerkoles, 11 Hunyo, nang ikasa ang buybust operation ng pinagsanib na mga operatiba ng Philippine Drug Enforcement Agency Regional Office – National Capital Region (PDEA RO-NCR) – Quezon City District Office (QCDO), at ng Regional Special Enforcement Team 2, sa pakikipagtulungan ng PNP Drug Enforcement Group – Special Operations Unit NCR at ng Valenzuela City Police Station Sub-Station 4 Malinta, sa Rincon St., Brgy. Malinta, Valenzuela City.

Sa operasyon ay nagpanggap na adik ang isang pulis at nang magkaabutan ng shabu ay dito na naglabasan sa kanilang pinagtataguan ang mga awtoridad at inaresto ang suspek na kinilalang isang alyas Romy, 46 anyos.

Nakompiska sa suspek ang halos isang kilo ng shabu na nasa loob ng aluminum foil pack, may markang Qin Shan, at nakasilid sa green ecobag, may label na 7/11, naglalaman ng isang brown paper bag na may logong “Adidas and Adiclub JOIN US NOW.”

Ang mga nasabat na ilegal na droga ay tinatayang may halagang P 6,800,000 batay sa kasalukuyang kalakaran.

Kasalukuyang nasa kustodiya ng PDEA RO-NCR ang suspek at inihahanda ang mga kasong paglabag sa Section 5, Article II ng Republic Act 9165, kilala rin bilang Comprehensive Dangerous Drugs Act of 2002. (ALMAR DANGUILAN)