HATAW! D'yaryo ng Bayan hatawtabloid.com
MAHIGIT 12,000 pulis mula sa Police Regional Office 3 (PRO3) ang kasalukuyang naka-deploy na sa iba’t ibang polling precincts sa Gitnang Luzon simula pa noong Linggo, 4 Mayo, bilang bahagi ng pinaigting na seguridad at kahandaan para sa nalalapit na halalan sa Lunes, 12 Mayo.
Kabilang sa mga ipinakalat ay hindi lamang ang mga tauhan na mula sa iba’t ibang police stations, kundi maging ang mga personnel mula sa regional at provincial headquarters, upang tiyakin ang maayos, mapayapa, at ligtas na pagdaraos ng eleksiyon sa buong rehiyon.
Ayon kay P/BGen. Jean Fajardo, regional director ng PRO3, ang malawakang deployment ng pulisya ay bahagi ng kanilang mandato na tiyakin ang isang ligtas, malaya, at mapanagutang eleksiyon.
Aniya, nakatutok sila hindi lamang sa seguridad ng mga presinto, kundi pati na rin sa pagbibigay proteksiyon sa karapatan ng bawat botante.
Dagdag ng opisyal, naka-full alert status ang buong rehiyon at mahigpit ang koordinasyon ng PRO3 sa COMELEC, AFP, at iba pang ahensiya upang matiyak ang mabilis at maayos na pagtugon sa mga insidente na maaaring makasagabal sa proseso ng halalan.
Hinikayat din ng PRO3 ang publiko na makipagtulungan sa mga awtoridad at agad ireport ang mga kahina-hinalang aktibidad upang mapanatili ang kaayusan at kapayapaan sa panahon ng eleksiyon. (MICKA BAUTISTA)
