P10-M makinaryang pambukid ipinagkaloob ng PAGCOR sa Bulacan

PORMAL nang ipinagkaloob ng Philippine Amusement and Gaming Corporation (PAGCOR) ang P10-milyong halaga ng mechanized farming equipment kabilang ang dalawang unit ng combined harvester at limang unit ng mini-4-wheel tractors sa harap ng Provincial Capitol Building, sa lungsod ng Malolos, lalawigan ng Bulacan.

Pamamahalaan ang mga makinaryang ito ng PGB na ang mga magsasakang Bulakenyo ay magkakaroon ng madaling pagkuha kung kailangan nilang gamitin.

Sa pakikipagtulungan nina Bulacan 1st District Representative Danilo Domingo at Gov. Daniel Fernando, inilabas ng PAGCOR ang mga nasabing makinarya upang magamit ng mga magsasaka mula sa lungsod ng Malolos, at mga bayan ng Bulakan, Calumpit, Hagonoy, Paombong, at Pulilan.

“Iisa lang po ang hinihiling kong kapalit ng biyayang ipinanaog naming tapusin sa hapon na ito. Sana po’y lalo kayong ganahan pang magsaka, ibahagi ninyo sa mga kabataan nang sa ganoon ay lalo pang umunlad ang sektor ng agrikultura rito. Hindi lamang sa unang distrito, hindi lamang sa lalawigan ng Bulacan, kundi sa buong bansang minamahal nating Filipinas,” ani PAGCOR Chair & Chief Executive Officer (CEO) Alejandro Tengco.

Samantala, nagpahayag ng pasasalamat si Fernando kay Tengco sa malaking tulong nito sa pagpapalakas ng sektor ng agrikultura ng lalawigan.

“Chairman, thank you so much po sa pagmamahal na ibinibigay mo sa ating lalawigan at lalong-lalo po sa District 1. Ito po ay malaking bagay para sa ating mga magsasaka sapagkat ito ay hinahanap nila. At talaga namang ito’y kailangang-kailangan ngayon in advance technology of farming. Kailangang-kailangan na po ito talaga at ‘yung iba kasi nahihirapang yumuko ‘di ba para magtanim,” pasasalamat ng gobernador.

Binigyang-diin din ng gobernador ang mga programa ng PGB kabilang ang Bulacan Farmer’s Productivity Center and Training School, at ang Provincial Government Multiplier and Breeding Center para makamit ang food security at sufficiency. (MICKA BAUTISTA)