Mag-asawa tinarget ng tatlong kawatan

ISANG mag-asawang kararating lang sa kanilang bahay ang pinagnakawan ng tatlong hindi pa nakikilalang kawatan sa San Miguel, Bulacan kamakalawa ng gabi.

Sa ulat na ipinadala kay Police Colonel Relly Arnedo, provincial director ng Bulacan PPO, kinilala ang mga biktima na sina Marciano Cruz Jr. at Myla Cruz, kapuwa 53 taong gulang at residente ng Barangay Salangan sa nasabing bayan.

Lumabas sa inisyal na imbestigasyon ng mga tauhan ng San Ildefonso MPS na kararating lang ng mag-asawang Cruz sa kanilang bahay bandang 9:20 ng gabi at isasara na sana ang kanilang gate nang dumating ang tatlong armadong suspek at sabay tutok ng baril ay inutusan ang mga biktima na ibigay ang kanilang mga mahahalagang gamit.

Nakuha ng mga armadong kawatan mula sa mag-asawa ang P150,000 na cash, alahas at gadget na nagkakahalagang P150,000 at tumakas sakay ng motorsiklo patungo sa direksyon ng bayan ng San Ildefonso. (MICKA BAUTISTA)