HATAW! D'yaryo ng Bayan hatawtabloid.com
INARESTO ng mga tauhan ng Bulacan Provincial Police office (PPO) ang tatlong hinihinalang tulak ng ilegal na droga at limang pinaghahanap ng batas sa isinagawang anti-crime drive operations sa lalawigan nitong Linggo ng umaga, 2 Hunyo.
Sa ulat na ipinadala kay P/Col. Relly Arnedo, provincial director ng Bulacan PPO, nadakip ang tatlong suspek sa droga sa ikinasang drug sting operation ng mga Station Drug Enforcement Unit (SDEU) ng Baliwag, San Miguel, at Pulilan C/MPS.
Nakompiska muka sa mga suspek ang anim na plastic sachet ng hinihinalang shabu, isang malaking plastic sachet ng hinihinalang pinatuyong dahon ng marijuana, isang malaking transparent plastic na naglalaman ng maliit na bloke ng hinihinalang pinatuyong dahon ng marijuana, at buybust money.
Samantala, nadakip ang limang puganteng wanted sa iba’t ibang krimen at paglabag sa batas sa manhunt operation na inilatag ng tracker team mula sa San Jose Del Monte at Baliwag CPS, Hagonoy, Marilao, at San Miguel MPS.
Kasalukuyang nasa kustodiya ng mga arresting station ang mga naarestong akusado para sa kaukulang disposisyon.
Ayon kay P/Col. Arnedo, hindi natitinag ang Bulacan PPO sa kanilang pangakong labanan ang kriminalidad at panatilihin ang kaligtasan ng publiko sa lalawigan na makikita sa pinaigting na operasyon, isang patunay ng dedikasyon at pagiging epektibo ng pagpapatupad ng batas sa pagsugpo sa mga ilegal na aktibidad ng ilegal na droga. (MICKA BAUTISTA)
