Trike driver dedbol sa dalawang bala

DEAD-ON-THE SPOT ang isang lalaki matapos barilin ng isang hindi pa nakikilalang lalaki sa bahagi ng lansangan sa Brgy. Bagong Barrio, Pandi, Bulacan kahapon ng umaga, Pebrero 5.

Sa ulat mula sa Pandi Municipal Police Station (MPS), kinilala ang biktima na si Fernando Lasco y Bulanadi, 55, may-asawa, tubong Candaba, Pampanga at kasalukuyang naninirahan sa Brgy. Siling Bata, Pandi, Bulacan.

Napag-alaman na humigit-kumulang alas-10:15 ng umaga, habang sakay ng minamanehong tricycle ang biktima ay biglang sumulpot ang salarin at pinagbabaril ito ng dalawang beses.

Ayon sa mga nakasaksi sa krimen, matapos matiyak na napuruhan ang biktima ay mabilis na tumakas ang salarin sa hindi pa malamang direksiyon.

Samantala ang mga intel operatives at investigation personnel ng Pandi MPS ay kaagad nagsagawa ng pagsusuri sa mga CCTV footages upang makilala ang suspek habang ang mga patroller ay naglatag ng local dragnet operation para sa posibleng pagdakip sa suspek. 

Gayundin ay hiniling ng IOC sa SOCO na iproseso ang pinangyarihan ng krimen habang patuloy pa rin ang follow up operation ng pulisya para makilala ang mga suspek at motibo sa krimen. (MICKA BAUTISTA)