Totoy tigok sa e-bike

PATAY ang isang 11-anyos batang lalaki matapos mabangga ng e-bike habang tumatawid sa kalsada sa Navotas City, kamakalawa ng gabi.

Nalagutan ng hininga habang nilalapatan ng lunas sa Tondo Medical Center (TMC) sanhi ng pinsala sa ulo ang biktima na hindi nabanggit ang pangalan, residente ng nasabing lungsod.

Pinaghahanap ng pulisya ang driver ng E-Bike, kinilalang si Ralph Justine Mahusay, 18 anyos, residente sa E. Mariano St., Brgy. Tangos-South na tumakas matapos malaman na namatay ang biktima.

Sa report ni P/Cpl. Dandy Sargento kay Navotas police chief P/Col. Santos Sumingwa, Jr., dakong 11:45 pm nang maganap ang insidente sa A.R. Cruz., Brgy. Tangos South, Navotas City.

Sa inisyal na imbestigasyon ng pulisya, tinatahak ng e-bike na minamaneho ng suspek ang kahabaan ng A.R Cruz St., patungo sa Tanglaw ng Wawa, Brgy. Tangos South nang mabangga nito ang biktima na tumatawid sa lugar.

Sa lakas ng impact, bumagsak ang biktima at humampas ang ulo sa sementadong kalsada na naging dahilan upang isugod siya ng suspek at mga tanod ng Barangay Tangos North sa nasabing ospital ngunit binawian ng buhay.

Inihahanda na ng pulisya ang pagsasampa ng kasong Reckless Imprudence Resulting in Homicide kontra sa suspek sa Navotas City prosecutor’s office. (ROMMEL SALES)