HATAW! D'yaryo ng Bayan hatawtabloid.com
ALAM MO NA!
ni Nonie Nicasio
TAMPOK ang AQ Prime artist na si Yana Fuentes sa pelikulang Peyri Teyl mula sa pamamahala ng premyadong direktor na si Joel Lamangan.
Si Yana ay isang Pinay-Japanese na nagtapos ng kursong International Business Law sa Tokyo. Siya ay isang model at beauty queen sa Japan at naging Miss Universe Japan – 2nd runner up.
Ayon sa beauty queen-turned actress, sa lahat ng nagawa niyang project ay pinaka-challenging ang Peyri Teyl.
Aniya, “Ang Peyri Teyl po talaga, kasi dati ko pa po dream na maging parang prinsesa sa isang fairy tale and siyempre po, ‘yung director ay ang award winning na si direk Joel Lamangan.
“Kakaibang sarili ko po ang makikita n’yo rito and all effort inilabas ko po talaga para maging maganda ang acting ko sa movie. Sobrang thankful din po ako kay direk Joel, kasi ang dami niyang itinuro sa akin.”
Sino ang co-stars niya rito? “Sina EA Guzman, Lou Veloso, Albie Casiño, Ate Gay, Iñaki Torres, and Drei Arias po.”
Nabanggit din ni Yana na nakaranas siyang mapagalitan at masigawan dito ni Direk Joel.
Esplika ni Yana, “Sa una po nagulat ako kay direk Joel kasi po ang daming beses niya ako pinagalitan and sinigawan. Pero nagpapasalamat po talaga ako sa kanya kasi tinulungan niya ako umarte nang maayos,” nakangiting sambit niya.
Inusisa rin namin kung nakailang pelikula na siya?
Tugon ng aktres, “Naka-four to five movies po ang na-shoot na and dalawa ang lumabas na po. Ito iyong Pula Ang Kulay Ng Gabi at Losers-1 Suckers-0 po.”
Ano ang project niya ngayon? “Right now wala pa po akong ginagawang movie project, pero I’ve appeared in fashion shows like Algodon and Bench Fashion Week.”
Nasabi rin ng aktres kung ano ang mga pinagkakaabalahan niya ngayon.
Pahayag ni Yana, “Actually nagwo-work po ako sa Japanese company here in Manila and nag-focus po ako sa pagmo-model, sa social media, and at the same time, sumasali po ako sa mga acting workshop.”
Ano pa ang wish niyang mangyari sa kanyang showbiz career?
“Ang dami ko pa pong wish na mangyari sa showbiz. Gusto ko pa po lumabas sa movies and sunod naman po sa mga teleserye. I wish to be in the TV soon po,” pakli ni Yana.
