Kampanya vs krimen pinaigting  
6 AKUSADO NASAKOTE

SA PINAG-IBAYONG kampanya ng pulisya laban sa krimen, sunod-sunod na pinagdadampot ang anim na indibiduwal na pawang may paglabag sa batas sa lalawigan ng Bulacan nitong Sabado, 10 Hunyo.

Nasukol ng tracker team ng Bulacan 2nd PMFC at warrant operatives ng San Rafael MPS ang suspek na kinilalang si Henry Dela Cruz, may warrants of arrest sa dalawang bilang ng kasong Acts of Lasciviousness kaugnay ng RA 7610; dalawang bilang ng kasong Lascivious Conduct alinsunod sa RA 7610; at limang bilang ng kasong Qualified Rape na inamyendahan ng RA 8353, at walang inirekomendang piyansa.

Sa nasabing magkasanib na operasyon ng mga tauhan ng Sta. Maria MPS, nadakip ang suspek na kinilalang si Romel Ganas, may warrant of arrest para sa kasong Qualified Theft.

Gayondin, sa kampanya laban sa ilegal na droga, naaresto ng mga tauhan ng San Miguel MPS Drug Enforcement Unit ang drug peddler na nasa PNP/PDEA drugs watchlist na kinilalang sina Joseph Pori at Allan Badar sa Brgy. Salangan, sa bayan ng San Miguel, nakompiskahan ng 10 selyadong pakete ng plastik ng shabu.

Samantala, nasukol ng mga elemento ng Malolos CPS ang mga suspek na kinilalang sina Teodulo Ponce at Mary Leslie Jane Ponce sa pagbibiyahe ng mga puslit na sigarilyo sa Brgy. Tikay, sa lungsod ng  Malolos.

Nakatakdang sampahan ang mga suspek ng mga kasong paglabag sa RA 8293 o ang Intellectual Property Code of the Philippines (Section 155 at Section 170-selling and transporting of suspected Fake/Counterfeit Cigarettes), paglabag sa RA 8424 (Tax Reform Act of 1997), paglabag sa RA 10643 (The Graphic Health Warnings Law), paglabag sa RA 7394 (Consumer Act Law), at paglabag sa  RA 9211 (Tobacco Regulation Act of 2003). (MICKA BAUTISTA)