Sa Sta. Maria, Bulacan
P5-M PASONG FOOD PRODUCTS NASAMSAM

Nakumpiska ng pinagsanib na puwersa ng kapulisan ang dalawang kategorya ng expired at tampered na food products na ilegal pa ring ibinebenta sa ipinatupad na search warrant sa bayan ng Sta. Maria, sa lalawigan ng Bulacan nitong Lunes, 10 Abril.

Sa ulat na ipinadala kay P/BGen. Jose Hidalgo, Jr., Regional Director ng PRO3, ipinatupad ng magkasanib na operating teams mula sa Regional Special Operations Group (RSOG), 301^st MC RMFB3 at Sta. Maria MPS sa ilalim ng pangkalahatang superbisyon ni P/Lt. Col. Jay Dimaandal, AFC, RMFB3/Chief, RSOG3 kaagapay si Rex Anonas, Division Security and Safety Manager ng San Miguel Foods, Inc., ang Search Warrant No. 2023-026-PSG para sa paglabag ng Sec. 169 kaugnay sa Sec. 170 ng RA 8293 (Intellectual Property of the Philippines) na inisyu ni Presiding Judge Elma Rafallo-Lingan, ng Pasig City RTC Branch 159 sa Brgy. Parada, sa nabanggit na bayan.

Nadakip sa operasyon ang mga suspek na kinilalang sina Gloria Cacanindin, Rachel Constantino at Rica Rodriguez, habang nagawang makatakas ni Noel Cacanindin.

Nasamsam sa operasyon ang mga kahon ng 3-in-1 coffee at mga de-latang pagkain na tinatayang nagkakahalaga ng P5,000,000; pedal sealing machine; sari-saring labelling paraphernalia; at isang kahon ng specimen sample; at dalawang Isuzu Elf trucks.

Kasalukuyang nasa ilalim ng kustodiya ng RSOG ang mga suspek na sasampahan ng naaangkop na kaso sa hukuman. (MICKA BAUTISTA)