Killer ng brgy. captain sa Pampanga, iniutos ni RD Pasiwen na tugisin

Kinondena ng kapulisan sa Region 3 ang ginawang pagpatay kay Brgy.Captain Jesus Liang y Lorenzana ng Brgy.Sto.Rosario, Lungsod ng San Fernando, sa Pampanga, gabi ng Disyembre 27 sa bahagi ng City Market Plaza sa nabanggit na barangay.

Si Brgy,Captain Lorenzana ay kaswal na naglalakad sa may Abad Santos St, City Market Plaza 4th nang walang kaabog-abog na barilin siya sa ulo na nagresulta sa agaran niyang pagkamatay.

Dahil dito ay ipinag-utos ni PRO3 Regional Director P/Brig.General Cesar Pasiwen ang malalimang pag-iimbestiga sa insidente at siliping maigi ang lahat ng anggulo at pagtatatag ng posibleng motibo sa krimen.

Dagdag pa ng opisyal na simula pa lamang ay todong nagpupunyagi na ang kanilang ginagawa upang malutas ang ganitong insidente ng krimen sa pamamagitan ng patuloy sa pangangalap ng mga ebidensiya na makatutukoy sa pagkakilanlan ng mga kriminal.

Tiniyak din ni RD Pasiwen sa publiko gayundin sa pamilya ng biktima na gagawin nila ang lahat ng kanilang magagawa upang malutas kaagad ang kaso sa pamamagitan ng masusing imbestigasyon.

Ipinahayg pa ng opisyal na lahat ng kaso ay binibigyan nila ng kahalagahan pero ang ganitong insidente ay itinuturing nila bilang Top Priority dahil ang sangkot ay barangay official.

Nagpahatid din ng pakikiramay ang opisyal sa pamilya ni Brgy.Captain Liang at patuloy aniya silang humihingi ng suporta sa publiko na kung sino o may nalalaman sila sa pagkakakilanlan ng gumawa ng krimen ay magpunta lamang sa kanilang tanggapan o tumawag sa PNP HOTLINE 09985985330/09175562597. (MICKA BAUTISTA)