4 tulak ng ‘omads,’ 7 tulak ng ‘bato’ timbog sa drug-bust

SUNOD-SUNOD na naaresto ang 11 personalidad sa droga sa ikinasang anti-criminality operation na isinagawa ng mga awtoridad sa lalawigan ng Bulacan nitong Lunes, 26 Disyembre.

Sa ulat mula kay P/Col. Relly Arnedo, provincial director ng Bulacan PPO, nagresulta ang drug bust operation sa Brgy. Sto Cristo, Malolos na pinangunahan ng Malolos CPS ang pagkakaaresto sa apat na marijuana dealers na kinilalang sina Ian Cabrera, Carl John Tolores, Rica Mariz Santos, at isang alyas Kian.

Narekober sa operasyon ang P60,000 halaga ng tuyong dahon ng hinihinalang marijuana na may timbang na 500 gramo.

Kasunod nito, nakompiska ng mga operatiba ng Malolos CPS sa Brgy. Mabolo ang P34,500 halaga ng hinihinalang shabu at marked money mula sa suspek na kinilalang si Ruben Gonzales matapos ang ikinasang drug trade.

Samantala, sa serye ng mga drug sting operation ng Station Drug Enforcement Units (SDEUs) ng police stations ng Hagonoy, San Miguel, San Jose del Monte, Pulilan, at Obando, nakasakote ang anim na personalidad sa droga, nasamsaman ng 23 pakete ng hinihinalang shabu at marked money. (MICKA BAUTISTA)