HATAW! D'yaryo ng Bayan hatawtabloid.com
HIMALANG nakaligtas ang isang opisyal ng munisipypyo nang tambangan ng magkaangkas sa motorsiklong mga suspek nitong Martes ng umaga, 1 Marso, sa Tibagan, Brgy. Sta. Rosa 2, sa bayan ng Marilao, lalawigan ng Bulacan.
Sa ulat mula sa Marilao Municipal Police Station (MPS), kinilala ang biktimang si Wilfredo Diaz, 54 anyos, Marilao Municipal Administrator, at residente sa Brgy. Loma de Gato sa nabanggit na bayan.
Sa ulat, inilarawan na ang gunman ay nakasuot ng kulay kahel na sweatshirt, itim na pantalon, at sombrero, samantala, ang kasama niyang nagmamaneho ng itim na Honda Wave motorcycle, walang plaka, ay nakasuot ng itim na jacket, kulay asul na pantalong maong, at itim na helmet.
Sa inisyal na imbestigasyon, biglang tinabihan ng motorsiklo ang puting Mitsubishi Montero na minamaneho ng biktima dakong 7:45 am kamakalawa papunta sa trabaho saka sunod-sunod siyang pinaputukan.
Matapos ang pamamaril, tumakas ang mga suspek patungo sa direksiyon ng San Jose del Monte gamit ang kanilang getaway motorcycle.
Samantala, tila himalang hindi napuruhan ang biktima na nagawa pang makalayo sa lugar at agad nagpunta sa kanyang tanggapan sa Marilao Municipal Building saka ini-report ang pangyayari sa tanggapan ng Marilao MPS.
Sa isinagawang proseso ng PNP SOCO – Bulacan PPO sa sasakyan ng biktima, natagpuan ang walong basyo ng bala ng kalibre .45 baril sa pinangyarihan ng insidente.
Agad nagsagawa ng checkpoint at Oplan Sita ang pulisya ng Marilao MPS para sa posibleng pagkakakilanlan at pagkaaresto ng mga suspek. (MICKA BAUTISTA)
