Mahirap maikompara kay Aga Muhlach

HATAWAN
ni Ed de Leon

MALI ang ginagawa ng mga baguhang artista na sa hangad na mapag-usapan ay ikukompara ang sarili nila sa mga beterano at magagaling na actor. Ito naman sinasabi namin, dahil doon sa pakulo na sinasabi ng isang male star na siya raw ang gagawa ng isang role na dati nang nagawa ng actor na si Aga Muhlach.

Maling gimmick iyan. Hindi ba niya alam kung gaano kahusay
na actor si Aga? At dahil sa sinabi niyang iyon tiyak ikukompara siya ng audience sa galing ni Aga. Eh ano ang gagawin niya pagkatapos, kakanta siya ng “I did my best, but I guess my best wasn’t good enough?”

Ang dapat nga sana hindi nila pinalabas na iyon ay nagawa na ni Aga. Dapat ginawa niya ang pinakamatinding magagawa niya at kung mapuri siya, maski na iyong mga bayarang troll lang ang pumuri sa kanya, at may maglakas loob na magsabing mas magaling siya sa performance ni Aga ng parehong role, iyon iyon.

Pero ngayon pa lang ikukompara mo ang sarili mo kay Aga? Aba napakataas na ambisyon iyan.