Yorme, umiiwas sa mass gathering

BAGO ninyo away-awayin si Yorme Isko Moreno dahil sa kanyang desisyong ipasara ang mga sementeryo sa Maynila mula Oktubre 31 hanggang Nobyembre 3, na ginaya na rin ngayon ng Angeles City sa Pampanga at Cebu City, intindihin muna natin ang intensiyon ng pagbabawal.

Isang napakatandang tradisyon na ang paggunita sa mga yumao sa araw na iyan, na kung tawagin nga natin ay araw ng mga santo, kasunod naman ang araw ng mga kaluluwa. Iyan ay isa sa mga tradisyong dala sa atin ng pananampalatayang Katoliko, ibig sabihin umiiral na ngang kaugalian sa ating bansa sa loob ng 500 taon. Pero ngayon nga ay biglang hindi puwede iyon dahil ipinasasara ni Yorme ang mga sementeryo.

Iyang pagpapasara ng sementeryo ay pag-iwas sa gathering ng napakaraming tao. Kung titingnan ninyo, milyon ang bilang ng mga taong nagpupunta sa sementeryo, lalo na kung November 1. Sa panahong ito na pare-pareho tayong umiiwas sa pagkalat ng virus ng Covid19, talagang kailangan nga siguro ang ganyang mga desisyon. Maaari namang dumalaw sa mga yumao sa kahit na anong araw. Maaari na kayong magsimulang gunitain ang mga yumao kahit na ngayon pa lang.

Sa pananaw naman ng simbahan, mas mahalagang alalahanin sa pamamagitan ng panalangin ang mga yumao. Ang simbahan ay nagkakaloob din ng indulhensiya plenarya sa mga dadalaw at gugunita sa mga yumao, hindi lamang sa sementeryo kundi maging sa mga simbahan, at iyan ay maaari mula November 1 hanggang November 8. Kaya kung iisipin ninyo, wala namang problema kung isara man ang mga sementeryo sa mga araw na iyon.

Mas mahalaga ang kaligtasan ng mga nabubuhay kaysa pagdalaw lamang sa mga namatay na.

HATAWAN
ni Ed de Leon