HATAW! D'yaryo ng Bayan hatawtabloid.com
HIMALANG nakaligtas sa tiyak na kamatayan ang isang lalaking dance instructor makaraang tamaan ng siyam na bala sa katawan, nitong Sabado ng gabi sa Brgy. Pasong Putik, Quezon City.
Bagamat may siyam na tama ng bala mula sa hindi pa batid na kalibre ng baril, nasa ligtas nang kalagayan at nakaratay sa ospital ang biktimang si Michael Allan Velasco, 40, residente sa C. Benitez St., Cubao, QC.
Bagamat kinilala ang suspek sa alyas na Ronnie, patuloy na inaalam ng pulisya ang pagkakakilanlan sa suspek.
Sa ulat ni P/Lt. Col. Benjamin Gabriel Jr., hepe ng Quezon City Police District (QCPD) Fairview Police Station 5, naganap ang insidente dakong 9:00 pm nitong Sabado sa Champaca St., Brgy. Pasong Putik, QC.
Nauna rito, nakatanggap ng mensahe ang biktima mula sa kanyang Facebook account na kailangan ni Ronnie ang serbisyo ni Velasco bilang dance instructor para turuan ng sayaw ang mga kawani ng isang hardware.
Nagpadala ng paunang bayad na P1,000 si Ronnie kay Velasco para sa pasahe ng biktima papuntang Champaca St., mula Cubao. Pinaunlakan ng biktima ang imbistasyon.
Pagdating ni Velasco sa Champaca St., nagkita sila ni Ronnie at saka inutusan ng suspek si Velasco na umangkas sa dala-dala nitong motorsiklong “Mio.”
Dinala ng suspek ang biktima sa isang open court sa Chmapaca St., saka inagaw ang cellphone ng biktima bago pinaputukan nang siyam na beses.
Mabilis na tumakas ang suspek sakay pa rin ng kanyang motorsiklo habang si Velasco ay dinala sa ospital ng mga tumulong na mga tao sa nasabing lugar.
Patuloy na nagsasagawa ng imbestigasyon ang pulisya at inaalam kung may kuha ang mga CCTV sa pinangyarihan ng pamamaril.
ni ALMAR DANGUILAN
