Alex, nawalan ng panahon sa BF dahil sa politika

NAKABIBILIB naman itong si Alex Gonzaga, aba kahit kaliwa’t kanan ang tapings at showbiz commitments, may oras pa rin siya para isingit ang pangangampanya para sa kanyang pambatong Juan Movement partylist.

Ani Alex, wala sa bokabularyo niya ngayon ang pakikipag-date, sa halip ginugugol niya ang oras sa pag-iikot sa iba’t ibang lugar sa bansa para ipaalam ang advocacies ng Juan Movement na akma sa kanyang mga pinaniniwalaan.

Noon pa man, member na ang aktres ng grupo dahil nakasentro sa pamilya at bayan ang mga adhikain ng Juan Movement na pinangungunahan nina Jun Llave, Nico Valencia, at Mark Boado. Mga young entrepreneur at civic leader ang tatlo kaya nag-click bilang magkakaibigan na may iisang ipinaglalaban.

Malaki ang naiaambag ni Alex sa pagsama sa kampanya ng Juan Movement dahil aliw na aliw sa kanya ang mga tao. Paano naman, game na game siyang nakikipagbiruan kaya naman, mabilis nilang nauunawaan ang kanyang mensahe.

SHOWBIZ KONEK
ni Maricris Valdez Nicasio