Aktres, idinaramay ang mga kasambahay sa pagdidiyeta

KUNG ang isang amo ba’y nagpapa-sexy sa pamamagitan ng pagda-diet, makatarungan bang idamay nito ang kanyang mga kasambahay?

Ito ang himutok ng mga kasama sa bahay ng isang ‘di na gaanong aktibong aktres na may sinusunod ngang diet regimen pero tulad ng kanyang ginagawang pagpapagutom ay idinaramay niya ang mga ito.

Kuwento ng isa sa kanila, “Naku, si ma’am, imbiyernang-imbiyerna kapag naamoy niya ‘yung piniprito naming isda! Kesyo malansa raw ang amoy, kesyo mausok sa kusina…eh, anong gusto niyang kainin namin, ‘yun ding kinakain niya sa pagdidiyeta niya?”

Hindi naman anila makatwiran ang gustong mangyari ng kanilang amo. Saan daw sila kukuha ng enerhiya sa maghapong pagtatrabaho sa bahay kung ang kakainin nila ay puro mga kung ano-anong dahon, kapirasong isda at walang kanin?

“Si ma’am, afford niyang mag-diet na ganoon lang ang kinakain dahil wala naman siyang ginagawa sa bahay. Taga-utos lang siya sa amin, eh, kaming napapagod ang katawan, ‘yun lang ang ipakakain niya sa amin?”

Da who ang aktres na bida sa kuwentong ito? Itago na lang natin siya sa alyas na Marilen Balboa.

(Ronnie Carrasco III)