HATAW! D'yaryo ng Bayan hatawtabloid.com
NAGBABALA ang Philippine National Police (PNP) sa mga tindahan ng paputok na sumunod sa mas pinahigpit na mga patakaran kasunod nang pagsabog ng isang pagawaan sa Bocaue, Bulacan noong Oktubre.
Nitong Biyernes, sinimulan ng pulisya ang pag-iinspeksiyon sa mga tindahan ng paputok sa Bulacan na nagsisimula nang magbukasan, bilang paghahanda sa inaasahang pagdagsa ng mga mamimili para sa Pasko at Bagong Taon.
Ayon kay Supt. Romeo Caramat, Bulacan police director, maaaring ipasara ang mga tindahang hindi susunod sa mas pinahigpit na mga patakaran, at nag-abiso sa mga may-ari na maghanda para sa surprise inspections sa susunod na linggo.
Noong Oktubre, nasunog at sumabog ang isang pagawaan ng paputok sa Bocaue na ikinamatay ng dalawang biktima at marami ang nasugatan.
Bagama’t bakante ang lote na pinangyarihan ng pagsabog,
nagsimula nang magbukas ang mga tindahan ng paputok ilang metro ang layo mula rito gayondin sa ilang bayan.
( MICKA BAUTISTA )
