6 tiklo sa sinalakay na drug den sa Obando

ARESTADO ang anim katao makaraan salakayin ng mga awtoridad ang hinihinalang drug den na minamantine ng binansagang ‘Oca drug group’ kamakalawa sa Obando, Bulacan.

Sa ulat mula kay Philippine Drug Enforcement Agency (PDEA) Region 3 Office Director Gladys F. Rosales, kinilala ang naarestong mga suspek na sina Ronquillo R. San Diego alyas Oca, 52, itinuturong lider ng grupo; Erwin Sotto, 28; Renato San Diego, 30; Roger Espinola, 47; at Ryan G. Beato, 25, pawang residente ng Brgy. San Pascual sa naturang bayan.

Ayon kay Rosales, ang mga suspek ay naaktohan ng PDEA personnel habang sumisinghot ng methamphetamine hydrochloride (shabu) sa sinalakay na bahay ni San Diego sa bisa ng search warrant na inisyu ng korte. Sa report ni Rosales kay PDEA Director General Usec. Arturo Cacdac Jr., ang raiding team ay nakakompiska nang mahigit sa 55 gramo ng shabu na may P19,000 street value at drugs paraphernalia.