Nagkalat na pekeng resibo sa Maynila! (Attention: BIR)

Sandamakmak na reklamo na naman ang ipinarating sa atin, tungkol sa naglipanang pekeng resibo na ibinibigay sa mga motorist, market vendors at street vendors.

Isa na rito ang mga parking ticket na sinisingil ng ilang nakakuha ng kontrata ng mga parking slot sa city hall. Kitang-kita sa mga resibong ito na gawang-Recto o walang BIR authorize to print receipt.  

Ang siste, napakamahal ng singil sa ilang oras na parada. Gaya sa ilang lugar sa Divisoria na P150 sa first two hours?!               

Mas malaki pa ang singil sa mga biyahero ng gulay at prutas na ang kapalit ay pekeng-resibo na puwedeng gawing pamunas ng wetpaks!

May diskarte pa ang ilang berdugong mangingikil ng parking na kung lalampas sa oras ng parada ay hindi na sisingilin at idedeklara, basta maghahati na lang sa sobra!

Sonabagan!!!

Naalala ko tuloy noong administrasyon ni Mayor LIM, kinansela lahat ang sub-con sa parking at lahat ay ipinasok sa koleksiyon ng city hall.

Bakit ngayon ay nabalik na naman sa bulok na sistema?

Iba ang pekeng resibo para raw sa Manila Traffic, iba rin ang pekeng resibo na gamit ng ilang barangay sa paniningil ng parking.

Sa mga palengke ay ganyan rin ang ginagamit, Resibong-Recto pati sa bangketa vendors.

By the way, meron pa rin naniningil para sa Manila Hawkers, ‘e ‘di ba dissolved unit na ‘yan!?

Sabi naman ng isang bata-batuta sa Vice Mayor’s office, sinabihan daw sila na ‘wag makikialam at sumama sa mga ‘lakad’  ng mga tao ni ‘bigote’ sa mga pitsaan gamit ang mga pekeng resibo.

BIR Commissioner Kim Henares, pwede ho bang patingnan at paimbestigahan ninyo ang namamayagpag na pekeng resibo sa Kamaynilaan?

[divider]

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com