Misis trabahong-kalabaw sa Makati; Mister ‘doble-kayod’ sa ‘makating’ kulasisi

NAPUTOL ang malili­gayang sandali ng isag mister at ng kalaguyo nang ireklamo at ipahuli sa mga awtoridad ng misis na nagtatrabaho sa Makati City, nitong Linggo, 31 Enero, sa bayan ng San Miguel, lalawigan ng Bulacan.

Magkasamang himas-rehas ngayon sa kulungan ng San Miguel Municipal Police Sation (MPS) ang magkalaguyong kinilalang sina Jeffrey Lacanilao ng Brgy. Camias; at Evalyn Hipolito, 40 anyos, ng Brgy. Pulong Bayabas, sa naturang bayan.

Nahaharap ang mga inireklamong sina Lacanilao at Hipolito sa mga kasong paglabag sa RA 9262 (An Act Defying Violations Against Women and their Children) at Concubinage.

Napag-alamang du­mu­log sa himpilan ng San Miguel MPS ang biktimang itinago sa pangalang Milagros, at isinumbong ang kanyang mister na si Lacanilao na nakikiapid kay Hipolito.

Sinabi ng biktima sa mga awtoridad na sinasa­mantala ng dalawang suspek ang bawal na relasyon habang siya ay nagtatrabaho sa lungsod ng Makati.

Labis na sumabog ang galit ni Milagros dahil ang magkalaguyo ay idinaraos ang ‘kakatihan’ sa loob mismo ng bahay nilang mag-asawa.

(MICKA BAUTISTA)