HATAW! D'yaryo ng Bayan hatawtabloid.com
PINAHIHINTULUTAN ng Comelec ang tinatawag na substitution o pagpalit ng kandidatong nauna nang nag-file ng kanyang certificate of candidacy o COC para bigyang-daan ang pinal na tumatakbo sa anumang puwesto.
Itinakda ito hanggang November 29.
Dahil anong petsa lang ngayon ay may panahon pa para sa nasabing pagpapalit, at isa nga sa mga inaabangan ay ang balitang pagba-back out ni Chuck Mathay, ama ni Ara Mina, sa pagka-mayor sa Quezon City.
Dito kasi magkakaalaman kung ang pinal bang makaka-tandem ng vice mayoral candidate nitong si Councilor Roderick Paulate ay si Willie Revillame nga ba?
Tulad ng alam ng lahat ay matagal nang inaawitan si Willie na mamolitika na rin lalo ang pagiging punongbayan ng nasabing lungsod.
Pero bigo ang mga taong kumukumbinsi sa kanya dahil wala ang politika sa agenda ng TV host.
Still, hindi pa rin sumusuko ang ilan sa mga umaasang magbabago ang takbo ng isip ni Willie. Sa pagitan ng araw na ito at November 29 ay marami ang posibleng maganap.
Pero teka, habang nakatuon ang pansin ng madlang pipol sa Kyusi ay mayroon ding dapat antabayanan sa lungsod ng Pasay.
Bagama’t itinanggi na ng kapatid niyang si Chet, ayaw pa ring humupa ang tsismis na si Sharon Cuneta ang magsa-substitute sa pagka-mayor.
Abangan.
HOT, AW!
ni Ronnie Carrasco III
