HATAW! D'yaryo ng Bayan hatawtabloid.com
ANG sinasabi ni Sunshine Cruz, nakahanda naman siya. Nakipag-meeting na siya sa kanyang abogado at nagsabi rin naman ang boyfriend niyang si Macky Mathay na susuportahan ang aktres all the way matapos marinig ang kuwento niyon sa kanyang abogado.
Hindi naman itinatanggi ni Sunshine na kaibigan niya si Kathlyn Dupaya, pero ang sinasabi nga niya, hindi naisauli ang perang kinuha sa kanya sa napagkasunduan nilang panahon. Ibang usapan nga naman kung nakasingil na si Dupaya sa mga nagkakautang sa kanya o hindi, pero dapat panagutan niya ang kanyang obligasyon sa tamang panahon.
Pero nagsampa na sila ng mga kaso sa korte kaya siguro nga hindi na natin dapat pang pag-usapan ang mga bagay na iyan, ni bigyang daan pa kung ano man ang kanilang mga katuwiran. Dapat nga hintayin na lang natin ang kanilang ilalahad at kung ano ang magiging desisyon ng korte sa mga bagay na iyan. Alam naman siguro ng mga abogado nila kung ano ang kalalabasan niyan.
Ang maganda lang leksiyon sa mga pangyayaring iyan, huwag basta papasok sa investments na hindi maliwanag sa inyo kung anong negosyo ang pupuntahan. Kailangan ding pag-aralan kung legal ba. Mayroon bang rehistro sa SEC o ano ba iyan. Bibigyan ba kayo ng legal na stock certificate na maaari rin ninyong ibenta o ang ibibigay lang sa inyo ay parang promissory note na maibabalik ang pera ninyo at ang tubo niyon sa tamang panahon.
Marami dapat pag-aralan talaga bago pumasok sa isang investment project, lalo na’t ang isososyo naman ninyo ay hard earned money. Hindi bale sana kung galing lang sa “graft and corruption” eh, pero kung talagang pinaghirapan mong kitain, masakit talaga iyan.
HATAWAN
ni Ed de Leon
