HATAW! D'yaryo ng Bayan hatawtabloid.com
GINAWANG magandang ehemplo para sa mga kabataan si Alden Richards ni Laguna Vice Governor Atty. Karen Agapay. Hindi lang para sa mga kapwa niya taga-Laguna, kundi maging sa iba’t ibang panig ng bansa. Proud si VG Agapay sa narating ng kanyang kababayang ito na hindi lang isang mabuting anak, kundi marunong ding pahalagahan ang perang kanyang pinaghihirapan mula sa mundo ng showbiz.
Kaya naman upang maihalintulad ng mga kabataan sa Laguna ang kanilang kapalaran kay Alden, patuloy na nagsasagawa si Vice Gov. Agapay ng mga Local Recruitment Activity o Job Hiring kasama ang kanyang mga kaibigang kompanya na tinawag niyang VGO Partners for Job Opportunities.
Ang iba pang proyekto ni VG Agapay para sa Laguna ay ang Happy Wheels Project na namimigay siya ng wheelchairs at Free Legal Assistance para sa may problema sa birth certificate at pagbibigay ng affidavit at libreng notaryo.
Sa ngayon ay libo nang kabataan ang nabigyan ng trabaho ni VG Agapay at dire-diretso pa ang kanilang pag-ikot sa bawat distrito ng kanyang lalawigan upang masigurong ang lahat ng mga kabataang Lagunense ay may pagkakataong matupad ang kanilang mga pangarap sa buhay, tulad ng isang Alden Richards.
Thankful nga si VG Agapay dahil madalas na present si Alden sa mga events sa hometown ng aktor sa Laguna. Kaya talagang masasabing huwarang kabataan nga ang Eat Bulaga Dabarkads at Kapuso star na si Alden na swak maging inspirasyon ng maraming kabataan.
ALAM MO NA!
ni Nonie Nicasio
