Jackie Chan at Piece Brosnan, magsasagupa sa The Foreigner

DALAWANG respetadong aktor ang magkakabanggaan sa nakaaantig at napapanahong action thriller mula sa direktor ng Hollywood blockbuster film na Casino Royale.

Magbabanggan sina Jackie Chan at Pierce Brosnan sa The Foreigner. Gagampanan ni Chan si Quan, isang restaurant owner na namatayan ng anak dahil sa pambobomba ng mga terorista. Para matukoy ang mga salarin, humingi ng tulong si Quan kay Irish Deputy Minister Liam Hennessy na ginagampanan ni Brosnan. Nang tanggihan siya nito, ipinamukha ni Quan kay Hennessy ang lahat ng kanyang nalalaman tungkol sa nakaraan nito na nagpapatunay na may kakayahan si Hennessy na matukoy ang mga salarin. Para mabulabog si Hennessy at mapilitang ilabas ang impormasyon, ipinakita ni Quan na kaya rin niyang gumawa at magpasabog ng bomba.  Habang mas tumitindi ang tensiyon sa dalawa, nasisiwalat din ang iba pang trahedya sa buhay ni Quan, kaya’t puspusan ang paghahanap na ginawa niya sa mga terorista.  

Ayon sa producer na si Scott Lumpkin (Masterminds, Safe Haven, Best of Me), ang pelikulang ito ay tungkol sa paghahanap ng katarungan hindi lamang para sa katatapos na trahedya sa buhay ni Quan kundi para sa lahat ng sakit na pinagdaanan niya sa nakaraan. Ang pelikula ay base sa 1992 best selling novel na The Chinaman, ng acclaimed crime writer na si Stephen Leather.  
Habang isinusulat ang pelikula, nasa isip na ng screenwriter na si David Marconi (Enemy of the State, Live Free or Die Hard) na sina Chan at  Brosnan ang magiging star ng pelikula.

Tinanggap ng legendary martial artist ang papel dahil ayon sa kanya, ”Every year, I try to do something different…(this) will give audiences a chance to see another side of Jackie Chan.”

Sang-ayon si Lumpkin na ngayon pa lang makikita si Chan sa ganitong role dahil hindi lang basta aksiyon ang ipinakita ng aktor.  Tahimik ang pagkatao ng kanyang karakter at lahat ng ginagawa nito ay planado at matinding pinag-iisipan.
 
Inamin ng producer na si Jamie Marshall (Twilight, Warrior, Immortal) na kinabahan siya kung paano magagampanan ni Chan ang papel dahil punompuno ito ng ”energy and youth”, ngunit pagkatapos ng “hair and makeup and three hours of rehearsals with director Martin Campbell”, nakuha agad ni Chan ang kanyang papel, na ikinamangha ng producer.

Hindi maitatanggi na ”oozing with class” ang aktor na si Brosnan kaya binigyan niya ng ”sense of balance, coolness and class” ang karakter ni Hennessy. ”Hennessy is completely believable – he’s got a great charm at the beginning, but slowly he reveals how much of a bad-ass he is,” dagdag pa ni Lumpkin.  

Ito ay reunion movie ni Brosnan at ng director/master storyteller na si  Campbell.  Nagkatrabaho na sila sa 1995 James Bond movie, Goldeneye.  

Ipinagmamalaking ihandog ng VIVA International Pictures at MVP Entertainment ang The Foreigner na palabas na sa October 18.