PSC Chief Gregorio isinusulong unang Philippine Sports University

INILATAG ni Philippine Sports Commission (PSC) Chairman Patrick C. Gregorio ang isang makasaysayang panukala na maitatag ang kauna-unahang Sports University sa bansa sa ilalim ng University of the Philippines (UP) System, isang makabagong inisyatiba na naglalayong gawing ganap na industriya ng karangalan, edukasyon at kaunlaran ang larangan ng palakasan sa Pilipinas.

Sa kanyang talumpati sa pagtatapos ng mga estudyante ng UP College of Human Kinetics na ginanap sa Varsity Training Center, hinamon ni Gregorio ang pangunahing unibersidad ng bansa na manguna sa paghubog ng kinabukasan ng sports—hindi lamang bilang akademikong disiplina kundi bilang mahalagang sandigan ng pambansang pag-unlad.

“Ang pangarap ko para sa sports sa Pilipinas ay makabuo ng isang bansang maipagmamalaki. Kaya naman ang pangarap ko para sa UP ay ang pagtatatag ng isang Sports University—isang pamantasang huhubog hindi lamang ng mga kampeon kundi pati ng mga coach, sports scientist, guro, negosyante, administrador at mga innovator na siyang dahilan ng tagumpay ng ating mga atleta,” ani Gregorio.

Sa loob ng maraming dekada, madalas na itinuturing ang sports sa Pilipinas bilang simpleng libangan o katuwaan at hindi kasinghalaga ng iba pang propesyon. Ngunit nabago ito sa mga nakalipas na taon dahil sa mga tagumpay nina Hidilyn Diaz, ang kauna-unahang Pilipinong Olympic gold medalist, at gymnast na si Carlos Yulo, na nagpatunay na ang sports ay maaaring maging daan sa edukasyon, turismo, paglago ng ekonomiya at pagpapalakas ng pambansang dangal.

Ayon kay Gregorio, layunin ng panukalang Sports University na mapanatili at mapalawak ang mga tagumpay na ito sa pamamagitan ng paghubog ng bagong henerasyon ng mga atleta, coach at lider na may disiplina, integridad at malinaw na pananaw. Isusulong din nito ang mas propesyonal na sports education upang masuportahan ang mga atletang Pilipino ng makabagong sistema sa sports science, pagsasanay at pamamahala.

Binanggit din ni Gregorio ang ilang matagumpay na Sports University sa iba’t ibang panig ng mundo na nagsisilbing huwaran ng kahusayan at inobasyon sa larangan ng sports. Kabilang dito ang German Sport University Cologne sa Germany, Beijing Sport University sa China, Lesgaft National State University of Physical Education, Sport and Health sa Russia, at Nippon Sport Science University (NSSU) sa Japan.

Ang German Sport University Cologne ang pinakamalaking sports university sa Europa na nakapagluwal ng mga world-class coach, sports scientist at Olympian. Samantala, kinikilala ang Beijing Sport University bilang sentro ng sports science at athlete development na malaking ambag sa dominasyon ng China sa Olympic Games.

Ang Lesgaft National State University naman ay matagal nang nagsanay ng mga elite athlete ng Russia, habang ang Nippon Sport Science University ay tanyag sa pagsusulong ng sports medicine at paglinang ng mga Olympic champion.

Mas malapit sa Pilipinas, mayroon na ring sariling Sports University ang Thailand at Vietnam sa pamamagitan ng Thailand National Sports University (TNSU) at Vietnam National University of Physical Education and Sports (VNUPES).

Ang mga institusyong ito ang nagsisilbing pangunahing sentro ng sports education, athlete development at pananaliksik sa sports science sa kani-kanilang bansa.

Sa Pilipinas, nagsisilbi namang haligi ng sports education ang UP College of Human Kinetics sa nakalipas na 27 taon, dahilan upang maging matibay na pundasyon ito para sa planong pagtatatag ng Sports University.

Sa pananaw ni Gregorio, panahon na upang makasabay ang Pilipinas sa mga bansang matagumpay na ginamit ang Sports University bilang susi sa pandaigdigang kompetisyon at kahusayan.

Ayon pa sa PSC chairman, magdudulot ang Sports University sa ilalim ng UP ng malalaking benepisyo sa pagpapaunlad ng mga atleta, pagsasanay ng mga coach, pagpapalawak ng sports education, paglago ng sports industry at pagpapalakas ng pambansang pagkakakilanlan.

“Gawin mong masaya ang atleta, magtatagumpay ang mga Pilipino,” ani Gregorio. Aniya, ang tagumpay sa sports ay hindi nakasalalay sa isang tao o isang institusyon lamang kundi sa sama-samang pagtutulungan ng buong sports ecosystem.

Idinagdag din niya na maaaring gumanap ng mahalagang papel ang PSC sa pagpopondo sa planong UP Sports University, lalo na’t nagsisilbi rin siyang vice chair ng National Academy of Sports. Aniya, ang ganitong ugnayan ng mga institusyon ang maaaring maging susi upang maisakatuparan ang naturang pangarap.

Habang naghahanda ang Class of 2026 sa kanilang mga propesyon, hinikayat ni Gregorio ang mga nagtapos na lumabas ng Metro Manila, dalhin ang sports science sa mga komunidad na kulang sa serbisyo, at tumulong sa pagtatayo ng mga industriyang magbibigay ng mas maraming oportunidad sa mga Pilipino.

“Ang diploma ninyo ay hindi ang finish line. Ito ang inyong starting block. Pumunta kayo kung saan kayo higit na kailangan. Bumuo kayo ng mga atleta. Bumuo kayo ng mga komunidad. Bumuo kayo ng mga industriya. Para sa kabataan at para sa bayan,” aniya.

Kapag naisakatuparan, ang pagtatatag ng UP Sports University ay inaasahang magiging makasaysayang hakbang sa pagpapalakas ng sports bilang haligi ng pambansang pag-unlad at magbibigay sa Pilipinas ng mas matatag na puwesto sa pandaigdigang larangan ng palakasan. (PSC/HNT)