PSC, isinusulong ang Cauayan bilang bagong sentro ng rowing
CAUAYAN CITY — Sa tahimik na pampang ng Ilog Marabulig sa Cauayan, simpleng naglilingkod bilang barangay councilor si Joe Rodriguez nang muling tawagin siya ng kapalaran.
Pinili ng Philippine Sports Commission (PSC), katuwang ang Pamahalaang Lungsod ng Cauayan at ang Philippine Rowing Association (PRA), ang lungsod bilang tahanan ng isang regional training center para sa rowing.
Para sa 55-anyos na si Rodriguez, limang beses na SEA Games gold medalist at dating miyembro ng pambansang koponan, pagkakataon ito upang masuklian ang isport na nagbago sa kanyang buhay.
Hindi nagdalawang-isip si Rodriguez at agad na sinimulan ang paghahanda para sa proyekto bilang tugon sa hamon ni PSC Chairman Patrick Gregorio na makabuo ng isang waluhang (eight-man) rowing team at mga kalahok sa quad events—mga kategoryang hindi pa regular na nasasalihan ng Pilipinas sa mga pandaigdigang torneo.
“Sa pagtatatag ng training center na ito sa Cauayan, namumuhunan tayo sa isang henerasyong hindi lamang magsasagwan para sa medalya kundi para sa dangal ng bansa. Dito nagsisimula ang grassroots sports na magiging matatag na pundasyon ng tagumpay sa internasyonal na kompetisyon,” ani Gregorio.
Dahil tatlong bansa lamang ang karaniwang lumalahok sa eight-man event sa SEA Games, malaki ang tsansa ng Pilipinas na makapag-uwi ng medalya sa naturang kategorya.
Nagkaloob ang PSC ng mga world-class na kagamitan, kabilang ang apat-seater at walong-seater na bangka, sa idinaos na Cagayan Valley Sports and Youth Summit na pinangunahan ni Cauayan City Mayor Cesar Dy. Nagpadala rin ito ng mga batikang coach na nagbigay na rin ng karangalan sa bansa, kabilang ang 2000 Sydney Olympian na si Benjie Tolentino.
“Nasa mabubuting kamay ang ating mga rower. Sa paggabay ni Joe Rodriguez, makikita nila mismo ang isang kuwento ng tagumpay. Sa tamang panahon, dedikasyon at sipag, maaabot din nila ang podium,” sabi ni Dy.
Higit pa sa paghahanda ng mga kampeon ang layunin ng training center. Bahagi ito ng mas malawak na pagtutulungan ng PSC at ng Pamahalaang Lungsod ng Cauayan upang makalikha ng ligtas na espasyo para sa kabataan sa pamamagitan ng sports, na tampok sa isinagawang dalawang araw na summit.
Layunin ng programa na bigyang-kapangyarihan ang kabataan, hubugin ang disiplina, at palakasin ang kanilang pisikal at mental na kalusugan. Binigyang-diin ni Mayor Dy na ang sports ay hindi lamang tungkol sa paglikha ng mga kampeon kundi sa paghubog ng responsableng mamamayan.
“Ang Cagayan Valley Sports and Youth Summit ay isang malinaw na pahayag,” ani Gregorio.
“Ipinapakita natin sa ating kabataan na ang sports ang kanilang ligtas na espasyo, silid-aralan ng disiplina at entablado ng kanilang mga pangarap. Kapag nagtagumpay tayo rito, nagtatagumpay din tayo sa pagbuo ng mas malakas, mas malusog at mas responsableng henerasyon para sa bansa.”
Dinaluhan ang summit nina Samahang Basketbol ng Pilipinas Executive Director Atty. Erika Dy at National Youth Commission Commissioner para sa Luzon Michael Christophe Agustin, kasama ang mga kinatawan mula sa iba’t ibang sports organizations, mga institusyong pang-edukasyon at mga lokal na pamahalaan sa rehiyon.
Tinalakay ni Karate Pilipinas President Richard Lim ang pinakamahuhusay na pamamaraan sa pamamahala ng sports associations at clubs. Ibinahagi naman ni Association of Boxing Alliances in the Philippines President Marcus Manalo ang kahalagahan ng sports psychology para sa mahusay na performance at kapakanan ng mga atleta, habang tinalakay ni PSC Chief of Staff Prof. Louise Jashil Sonido ang wastong paggamit ng social media sa pagsusulong ng sports.
Nagbigay rin ng talakayan si Philippine National Anti-Doping Organization Head Dr. Alejandro Pineda Jr. tungkol sa anti-doping, habang ibinahagi naman ng sports journalist na si June Navarro ang pinakamahuhusay na kasanayan sa mainstream media.
Ayon kay Cauayan City Sports Development Head Jonathan Medrano, ito ang kauna-unahang summit na isinagawa sa rehiyon at nakatakdang palawakin pa ang pagtatatag ng mga training center para sa ball games, archery, futsal, cycling, swimming at iba pang sports.
“Layunin nito ang pagbibigay-kapangyarihan sa kabataan. Binibigyan natin sila ng pagkakataong maging mga lider ng hinaharap,” ani Medrano.
Para kay Rodriguez, higit pa sa isang programa ang misyong ito.
“Binago ng rowing ang buhay ko. Lumaki ako na nagpapakain lang ng mga kalabaw pero noong napili ako sa national team, nagbago ang lahat,” ani Rodriguez.
“Ibabahagi ko ang lahat ng natutunan ko bilang atleta, pati na rin ang mga aral na nakuha ko mula sa mga lokal at internasyonal na coach,” dagdag pa niya. (PSC/HNT)
